Hövzə Xəbər Agentliyinin verdiyi məlumata görə, Livanın Cəfəri məzhəbinin baş müftisi Şeyx Əhməd Qəbəlan Livan xalqına və siyasi qüvvələrə ünvanladığı müraciətdə ölkənin son dərəcə təhlükəli milli mərhələdən keçdiyini bildirib. O, Prezident Cozef Aunun imzaladığı «Çərçivə Sazişi»ni (Vaşinqton sazişi) sərt tənqid edərək vurğulayıb ki, bu sənəd Livanı misli görünməmiş milli, təhlükəsizlik və siyasi böhranla üz-üzə qoyub. Şeyx Qəbəlan bəyan edib ki, sözügedən razılaşma İsrailin maraqlarına xidmət edir, ölkəni daxili qarşıdurmaya sürükləməyi hədəfləyir və Livanın suverenliyini ciddi təhlükə qarşısında qoyur. Bu vəziyyət hətta 17 may 1983-cü il sazişi dövründə də görünməmişdi.
O əlavə edib ki, Prezident Cozef Aun və onun hökuməti «təkbaşına hazırlanmış layihə» adlandırdığı bu razılaşmanın bütün gizli məzmunundan, eləcə də onun doğuracağı ağır milli nəticələrdən tam məlumatlıdır. Şeyx Qəbəlan bildirib ki, sazişin təhlükəsizlik əlavələri Livanın milli maraqlarına, dövlət suverenliyinə və ölkənin müstəqil mövcudluğunun əsaslarına ciddi zərbə vurur. O vurğulayıb ki, məsələ yalnız uzun illərdir ölkənin müdafiəsinin ağır yükünü daşıyan cənub bölgəsi ilə məhdudlaşmır. Əksinə, bu razılaşma Livanı yeni daxili qarşıdurmalar və fitnələr burulğanına sürükləməyi hədəfləyən təhlükəli layihədir və belə bir fitnə alovlanacağı təqdirdə ölkədə heç nəyi salamat qoymayacaq.
Şeyx Əhməd Qəbəlan qeyd edib ki, bu gün Təl-Əviv mediası həmin razılaşmanı böyük nailiyyət kimi təqdim edərək iddia edir ki, bu sənəd müharibəni Livanın sərhədlərindən ölkənin daxilinə daşıyıb. Onun sözlərinə görə, məqsəd Livanı İsrailin təhlükəsizliyindən uzaqlaşdıraraq qanlı daxili böhranlara sürükləmək və İsrailin vasitəsilə Livanı öz vətəndaşlarının əli ilə dağıtmaq imkanı yaratmaqdır. O bildirib ki, Prezident Cozef Aun və onun hökuməti bu milli fəlakətə görə birbaşa məsuliyyət daşıyır. Şeyx Qəbəlan əlavə edib ki, Prezident Cozef Aun ordunu müqavimət qüvvələri ilə qarşı-qarşıya qoymaq və ölkəni daxili qarşıdurmaya sürükləməklə Təl-Əviv və Vaşinqtonun nail ola bilmədiyini həyata keçirəcəyini düşünür. Onun fikrincə, bu yanaşma Livanın tarixi təcrübəsini, xalqın böyük milli mübarizəsini və vətəndaş müharibəsinin acı nəticələrini nəzərə almayan təhlükəli siyasətdir.
O, həmçinin Nəbih Berri və Vəlid Cümblatın mövqelərinə istinad edərək bildirib ki, bu razılaşma sionizmin maraqlarına xidmət edən bir sənəddir və «Böyük İsrail» layihəsinin Yaxın Şərqdə həyata keçirilməsinə yönəlib.
Livanın Cəfəri məzhəbinin baş müftisi əlavə edib ki, Vaşinqton və Təl-Əviv bölgədəki müharibələrdə uğursuzluğa düçar olduqdan sonra bu dəfə siyasi hakimiyyət vasitəsilə Livana nüfuz etməyə çalışır və ölkəni «zəlzələ sazişi» adlandırdığı yeni bir razılaşma ilə üz-üzə qoyur. O bildirib ki, bu sənəd terrorçu İsrailə Livanın təhlükəsizlik sistemi, ordusu və siyasi hakimiyyəti üzərində təhlükəli təsir və nüfuz imkanı verir. Şeyx Qəbəlan vurğulayıb ki, bu, bütün meyarlara görə milli fəlakətdir və heç bir halda qəbul edilə bilməz.
Şeyx Əhməd Qəbəlan sonda vurğulayıb ki, mövcud hakimiyyətin yaratdığı fitnənin alovu bütün Livanı bürüməzdən əvvəl onun qarşısı alınmalıdır. O bildirib ki, Livan bu fitnəni həyata keçirmək üçün istifadə olunan bir qrupun maraqları naminə məhv edilməməlidir. Onun sözlərinə görə, Prezident Cozef Aun ölkənin ali milli maraqlarını təhlükə altına atan şəkildə təkbaşına siyasi və təhlükəsizlik qərarları verməyə çalışır. Şeyx Qəbəlan vurğulayıb ki, Livanın ehtiyacı milli həmrəyliyə əsaslanan, ABŞ-sionist fitnələrindən uzaq duran bir dövlət modelidir.
Livanın Cəfəri məzhəbinin baş müftisi Şeyx Əhməd Qəbəlan bildirib: «Ey əziz livanlılar! Cənub, Dahiyə və Bəqa bölgələrinin üzləşdiyi vəziyyət misli görünməmiş silah arsenalı ilə müşayiət olunan qlobal müharibənin tərkib hissəsidir. Bütün bunlar Livanın taleyini Netanyahu və Trampın masasına qoymuş, nə ölkənin cənubuna, nə də orada yaşayan insanlara əhəmiyyət verən, milli vicdandan uzaq olan bir icra hakimiyyətinin mövcudluğu fonunda baş verir. Bu vəziyyət Livanı hədəfə alan beynəlxalq planlardan ayrı deyil. Müqavimətin Livanı müdafiə etmək üçün göstərdiyi mübarizə bütün cəbhələrdə misilsiz qəhrəmanlıq nümunəsi olub. Buna baxmayaraq, mövcud hakimiyyət Livanın milli müdafiəsinin əsas dayağı olan müqavimət silahını aradan qaldırmağa çalışır. Halbuki həmin silah bu günə qədər Livanı, onun xalqını, dövlətin mövcudluğunu və ölkənin bütün əziz dini icmalarını qoruyub və bundan sonra da qorumağa davam edəcək.
Livanın Cəfəri məzhəbinin baş müftisi əlavə edib: Mövcud hakimiyyət yaxşı bilir ki, Livanın və onun suverenliyinin əsas təminatçısı olan müqavimət silahını aradan qaldırmaq qeyri-mümkündür, hətta bütün Yaxın Şərq alova bürünsə belə. Buna baxmayaraq, onlar Təl-Əviv və Vaşinqtonun maraqlarına xidmət edən bu təhlükəli fitnənin içinə sürüklənmək istəyirlər. Bu məsələ son dərəcə milli olmaqla yanaşı, eyni zamanda regional xarakter daşıyır. Hesablamalarda ediləcək hər hansı yanlışlıq bizi dağıdıcı regional müharibənin mərkəzinə sürükləyəcək. ABŞ və sionist rejimin Livan üzərində təkbaşına hökmranlıq dövrü artıq başa çatıb.
O davam edib: Bu hakimiyyətin imzaladığı razılaşma sionist-Amerika düşüncəsinin məhsuludur və onun mexanizmləri Livanı genişmiqyaslı daxili
qarşıdurma layihəsinin mərkəzinə çevirməyi hədəfləyir. Bunun qarşısı mütləq alınmalıdır və biz Livanı, onun xalqını və milli suverenliyini qorumaq üçün bu layihənin həyata keçirilməsinə imkan verməyəcəyik. Bu fəlakət qarşısında susmaq Livanın gələcəyinə və dövlət kimi mövcudluğunu davam etdirmək qabiliyyətinə ağır zərbə vuracaq. Biz milli məsuliyyət hissi ilə müqavimətə və ölkənin bütün daxili imkanlarına söykənən milli müdafiə siyasətini dəstəkləyirik ki, Livan sionist rejimin bölgəni öz nəzarəti altına almağa yönəlmiş layihəsi qarşısında öz varlığını qoruya bilsin.
Şeyx Əhməd Qəbəlan əlavə edib: Dünən radikal mövqeyi ilə tanınan Aron Abramoviç deyib: Hizbullah üç il ərzində Yaxın Şərqin ən güclü ordusu olan İsraillə üz-üzə gəldi, lakin məğlub olmadı və bundan sonra da məğlub olmayacaq. Buna baxmayaraq, bəzi dairələr mövcud Livan hakimiyyətini inandırmağa çalışırlar ki, Hizbullahı ölkə daxilində məğlub etmək mümkündür. Halbuki belə bir yanaşma Livanı hər şeyi yandırıb-yaxacaq təhlükəli fitnənin içinə sürükləyəcək.
O sonda vurğulayıb: Tarixi mövqeyim kimi bəyan edirəm: Ey livanlılar! Biz hamımız sevgi, səmimiyyət və təhlükəsizlik əsasında tarixi vətənimizi birlikdə bölüşən vahid milli ailə kimi yaşamaq istəyirik. Bunun yolu Livanın suverenliyini təmin edən milli müdafiə modelindən keçir. Lakin Prezident Cozef Aun belə bir yanaşmanı qəbul etmir. O, Livan xalqının, onun tarixi bağlarının və milli birliyinin əvəzinə beynəlxalq layihələrin arxasınca gedir. Livanın əsas problemi həmişə siyasi hakimiyyət olub və bu gün də belədir. Çünki bu hakimiyyət ölkənin gücünü, dövlətini və institutlarını ABŞ və İsrailin maraqları naminə istifadə etməyə çalışır. Bu isə Livanın milli suverenliyinə ağır zərbə vurur və ölkə üçün tam mənada milli fəlakət deməkdir. Vətənini itirən xalq bunun əvəzini heç bir başqa dəyərlə ödəyə bilməz.
Livanın Cəfəri məzhəbinin baş müftisi Şeyx Əhməd Qəbəlan vurğulayıb: «Fələstində sionist işğalı altında yaşayan müsəlman və xristianların təcrübəsi bu həqiqətin ən açıq sübutudur. Bütün siyasi qüvvələr yaxınlaşmaqda olan bu təhlükəli fitnənin qarşısını almaq və onun alovunu söndürmək məsuliyyəti daşıyırlar. Vəlid Cümblatın, Süleyman Fərənciyyənin, Nicah Vəkimin, “Camiətül-İslami”nin, Azad Vətənpərvər Hərəkatının, Suriya Sosial Millətçi Partiyasının, Livan Kommunist Partiyasının və digər milli qüvvələrin mövqeləri bizi mühüm milli yanaşma ilə üz-üzə qoyur. Bu şəraitdə “Əməl” Hərəkatı və Hizbullah Livanın milli kimliyini və dövlət modelini qorumaq uğrunda ən təhlükəli taleyüklü mübarizəni aparır, ölkənin suverenliyini müdafiə etmək naminə Livan tarixində görünməmiş dərəcədə ağır bədəl ödəyirlər.
Livanın Cəfəri məzhəbinin baş müftisi bildirib: «Ey livanlılar! Bu gün qərar vermək növbəsi sizindir. Biz Livan xalqına və onun milli qüvvələrinə, xüsusilə də ağır böhran anlarında tam etimad göstəririk. Tarix sübut edib ki, xarici güclər xalqları və siyasi qüvvələri bir-birinə qarşı qoymaqla ölkələri parçalayırlar. Bir dövlətə tam nəzarət edə bilmədikdə isə onu dağıdıcı vətəndaş müharibəsinin alovuna sürükləyirlər. Bu gün ölkə daxilində milli həmrəylikdən və siyasi birliyə söykənən mövqedən daha güclü təminat yoxdur. Vaxt isə hər cür səhlənkarlığın və gecikmənin əleyhinə işləyir. Buna görə də Livanı daxili milli fəlakətə sürükləməyin məsuliyyəti mövcud siyasi hakimiyyətin və Prezident Cozef Aunun üzərinə düşür. Xüsusilə də bu razılaşma ABŞ və İsrailin müharibə yolu ilə əldə edə bilmədiklərini Netanyahuya qazandırır və Livanın daxilini parçalamağa əsaslanan yeni siyasi reallıq formalaşdırır. Daha təhlükəlisi isə budur ki, mövcud hakimiyyət bu kağız üzərindəki razılaşmaya əsaslanaraq Livanın işğal altında olan torpaqları məsələsindən geri çəkilib, qarşıdurmanın idarə olunmasını terrorçu İsrailin xeyrinə müəyyən edilmiş təhlükəsizlik və siyasi şərtlər çərçivəsində qəbul edib. Halbuki hakimiyyət müqavimətin misilsiz qəhrəmanlığından bəhrələnən milli müdafiə strategiyası hazırlamalı idi. Əvəzində isə müqaviməti və onun silahını aradan qaldırmağa çalışır. Halbuki bu silah onilliklər ərzində Livanın milli suverenliyinin ən mühüm təminatçısı olub. Bu gün Prezident Cozef Aun və onun hökuməti sionist qüvvələrin geri çəkilməsini elə təhlükəsizlik şərtlərinə bağlayır ki, bu da Livan ordusunu ölkənin ən təhlükəli milli fitnəsinin mərkəzinə sürükləyir. Halbuki bizim Livan ordusuna inamımız ondan ibarətdir ki, o, mövcud hakimiyyətin, Vaşinqtonun və Təl-Əvivin siyasi oyunlarından daha böyükdür.
Şeyx Əhməd Qəbəlan vurğulayıb: Biz Livanın ən təhlükəli milli mərhələsi ilə üz-üzəyik. Buna görə də bildirirəm ki, bizim üçün Livanın suveren maraqlarını təmin edən tarixi tərəfdaşlıqdan və milli birlik modelindən daha dəyərli heç nə yoxdur. Biz heç bir hakimiyyətə terrorçu İsrailin maraqlarına xidmət edən hər hansı layihəni həyata keçirmək imkanı verməyəcəyik. Prezident Cozef Aunun Livan üçün suverenlik uğuru kimi təqdim etdiyi məsələ əslində terrorçu Netanyahuya pulsuz hədiyyə edilmiş böyük bir milli fəlakətdən başqa bir şey deyil.
O, çıxışının sonunda bildirib: Xristian qardaşlarıma müraciət edərək deyirəm: Siz bu tarixin, milli tərəfdaşlığın, həzrət Məsihin (ə) uca mənəviyyatının və onun səmavi ruhunun ayrılmaz hissəsisiniz. Xristianlıq və İslam Livanın qəlbi, onun varlığının və davamlılığının əsas sütunlarıdır. Bu gün elə bir tarixi məqamdır ki, Livanın tarixi kimliyinin, milli birliyinin və səmavi irsinin məhv edilməsinin qarşısını alacaq qəti mövqe ortaya qoyulmalıdır. Cənub bölgəsinin onilliklər ərzində qətliamlar, dağıntılar, hücumlar və işğallarla üzləşməsi yeni milli baxışın formalaşması üçün səmimi bir dərs olmalıdır. Çünki şiələrin tarixi, Seyid Əbdülhüseyn Şərəfəddinin, İmam Musa Sədrin, “Əməl” Hərəkatının və Hizbullahın fəaliyyəti Livanın suverenliyi uğrunda misilsiz fədakarlığın və görünməmiş qurbanların parlaq nümunəsidir.
Bütün bunlar məzhəbçilikdən və regional təəssübkeşlikdən tamamilə uzaqdır. Biz Livan xalqına, milli qüvvələrə və onların yüksək milli ruhuna ümid bəsləyirik. Bu gün qərar vermək vaxtı Livan xalqınındır və Livanın məhv edilməsinə səssiz qalmaq yolverilməzdir.
Rəyiniz